Saga
IKEA kynnir nýja öryggislæsingu til þess að draga úr fallhættu húsgagna
Öryggi er númer eitt tvö og þrjú í IKEA vöruþróun. Þess vegna gerum við kommóðurnar okkar eins stöðugar og við getum. En enginn getur spáð fyrir um allar aðstæðurnar sem daglegt líf heima getur skapað. Þess vegna kynnum við nýja öryggislæsingu sem dregur úr hættu á að húsgagnið falli fram fyrir sig. VIHALS kommóðurnar eru fyrstu húsgögnin með þessa læsingu.
Slysin gera ekki boð á undan sér. Þau geta til dæmis gerst þegar barn dregur út skúffu til að búa til teppahús eða ef fullorðinn styður sig við opna skúffu. Þess vegna er nauðsynlegt að festa kommóðuna við vegg til þess að hindra að hún falli fram. Tilgangur nýju öryggislæsingarinnar er að hvetja fólk til þess að veggfesta húsgögn og gera kommóður öruggari. „Læsingin virkar á þann hátt að kommóðan þarf að vera fest við vegginn til þess að hægt sé að opna fleiri en eina skúffu. Þetta dregur úr hættunni á að kommóðan falli fram fyrir sig, þótt aldrei sé hægt að koma alveg í veg fyrir það. Þegar þú festir kommóðuna við vegg er hægt að opna allar skúffurnar á sama tíma“, segir Björn Andreasson úr vöruþróunarteyminu.
Alhliða nálgun á öryggi
VIHALS kommóðan er fyrsta húsgagnið með nýju öryggislæsingunni okkar. Í hönnunarferlinu prófaði teymið ýmislegt áður en að niðurstöðu var komist. „Nýja öryggislæsingin er frekar lýsandi fyrir IKEA“, segir Björn Andreasson. „Við höfum alltaf farið eftir gildandi öryggisstöðlum í hverju landi en það var ekki alveg nóg fyrir okkur. Núna viljum við vera skrefi á undan. Daglegt líf getur verið ófyrirsjáanlegt og þess vegna erum við sífellt að þróa vörurnar okkar áfram þegar kemur að því að gera heimilið öruggara“, segir Björn.
