Á fyrstu vikum og mánuðum barnsins verjum við miklum tíma í að baða barnið og skipta um bleyjur eða föt. Þessar stundir eru mikilvægar þegar kemur að tengslamyndun barna og foreldra. Mikilvægt er að gæta fyllsta öryggis á þessum stundum og eins þegar barnið þroskast og fer að hreyfa sig meira.

Slysin gerast síður þegar vel er fylgst með barninu

Þegar þú baðar og skiptir á barninu eru mestar líkur á að slysin gerist ef þú ert annars hugar, til dæmis ef þú ert að gera marga hluti í einu. Í okkar daglega lífi er margt sem þarf að huga að, en með stöðugu eftirliti með barninu ættir þú að geta komið í veg fyrir helstu hætturnar; að barnið detti, brenni sig eða drukkni og seinna þegar það fer að kanna umhverfið þarf að huga að eitruðum efnum á heimilinu. Njóttu þess að eiga stundir með barninu á afslappandi og öruggan hátt og mynda dýpri tengsl.

Vissir þú?

Lítil börn geta drukknað afar skyndilega í vatni sem er aðeins örfáir sentimetrar að dýpt.

Áhyggjulaus bleyjuskipti og baðferðir

Umönnun barna getur gengið snurðulaust fyrir sig en þó þarf að hafa eftirfarandi atriði í huga:

Nokkur ráð fyrir öruggari bleyjuskipti

• Hafðu allt til taks svo þú þurfir ekki að sleppa höndum af barninu á meðan þú skiptir á því. Þú getur líka skipt á því á gólfinu.

• Börn gætu spriklað og dottið af skiptiborði, þau mega aldrei vera eftirlitslaus.

• Höfuð barna er þyngra en líkaminn sem eykur líkur á að þau detti.

• Öryggisgrindin sem er á skiptiborðum hjálpar en kemur ekki í veg fyrir að barnið detti.

Nokkur ráð fyrir öruggari baðferðir

• Hafðu börn aldrei eftirlitslaus í baði – þau geta átt erfitt með að standa upp aftur ef þau renna og detta og geta drukknað í vatni sem er aðeins örfáir sentimetrar að dýpt.

• Stöm motta í baðinu minnkar hættu á að barnið renni til.

• Hitastig baðvatnsins ætti að vera það sama og líkamshiti barnsins eða lægra. Börn eru með þunna, viðkvæma húð sem brennur auðveldlega.

• Lyf, snyrtivörur, hreinsiefni og önnur skaðleg efni á baðherbergjum eiga að vera þar sem börn ná ekki til – sérstaklega þegar börnin eru byrjuð að hreyfa sig og kanna heimilið.