Öryggi barna í eldhúsinu

Þungar pönnur, heit heimilistæki, beitt áhöld … í eldhúsinu eru ýmsar hættur fyrir forvitin börn. Sem betur fer er hægt að gera einfaldar ráðstafanir til að minnka líkurnar á slysum – hvort sem börnin eru að hjálpa til við matreiðsluna, leika sér í grennd eða bara að forvitnast.

Öruggara eldhús

Eldhúsið getur verið spennandi staður fyrir börn – góður matarilmur, spennandi hljóð og margt að sjá. Það getur verið erfitt að veita börnunum fulla athygli þegar við höfum í nógu að snúast. Þess vegna er mikilvægt að huga að almennu öryggi í eldhúsinu með því að hafa hættulega hluti þar sem börn ná ekki til eða á læstum stað. Þegar börnin verða aðeins eldri vilja þau gjarnan taka þátt í eldamennsku eða bakstri. Með rétta búnaðinum og varúðarráðstöfunum getur þú leyft barninu að hjálpa þér á öruggan hátt – og þá lærir það helstu húsverkin á sama tíma.

Vissir þú?

Börn eru með mun þynnri húð en fullorðnir. Barni getur því fundist volgur kaffibolli brennheitur.

Öryggisþættir sem stuðla að barnvænna eldhúsi

Reykskynjari, slökkvitæki og eldvarnarteppi eru nauðsynleg öryggistæki í sérhverju eldhúsi því eldur á heimilum á oftast upptök sín í eldhúsinu. Þegar börn eru á heimilinu er helsta ráðið til að tryggja öryggi í eldhúsinu að hafa alla hluti, sem geta mögulega valdið slysi, á öruggum stað.

Nokkur ráð fyrir öruggara eldhús

· Festu frístandandi eldavél tryggilega við vegg til þess að koma í veg fyrir að barnið velti henni um koll með því að hanga eða klifra á hurðinni.

· Vertu með barnalæsingu á ofninum – og notaðu hana.

· Settu krækjur eða lása á eldhússkúffur og -skápa svo barnið komist ekki í hættulega hluti.

· Hreinsiefni, uppþvottavélatöflur, hættuleg efni, lyf og smárafhlöður og slíkt þarf að vera geymt þar sem börn ná ekki til, helst í læstum skáp, vegna hættu á eitrun eða köfnun.

· Beitt áhöld eins og hnífar og skæri eiga að vera geymd þar sem börn ná ekki til.

· Geymdu plastpoka og umbúðafilmur þar sem börn ná ekki til því þeim fylgir köfnunarhætta.

Nokkur ráð til að draga úr slysahættu í matartímanum

· Til að koma í veg fyrir að börn komist í heit eldunarílát skaltu nota aftari hellurnar og snúa handföngunum aftur.

· Notaðu háan barnastól með breiðum og stöðugum grunni, með beisli.

· Öruggast er að nota barnastól með áföstu borði því þá nær barnið ekki með fótunum í matarborðið til að spyrna sér aftur á bak.

· Leggðu á borð þannig að barnið geti ekki gripið í hornið á dúk eða heit matvæli.

· Hornhlífar á borðum og skápum geta komið í veg fyrir að barnið slasist þegar það rekst í brúnirnar.